ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
ឯកឧត្តម អ៊ិត សំហេង លើកឡើងថា រាជរដ្ឋាភិបាលកម្ពុជា បានបង្កើតគណៈវិស្វករកម្ពុជាឡើង ដើម្បីប្រមូលផ្តុំនិងគ្រប់គ្រងវិស្វករទូទាំងប្រទេសមកចុះបញ្ជីនៅគណៈវិស្វករកម្ពុជា ដើម្បីអប់រំបណ្តុះបណ្តាលបង្កើនសមត្ថភាពបច្ចេកទេស គ្រប់មុខជំនាញវិជ្ជាជីវៈវិស្វកម្មឲ្យមានគុណភាព ប្រសិទ្ធភាព សុវត្ថិភាព ស្ថិរភាព ប្រកបដោយការទទួលខុសត្រូវខ្ពស់ ដែលធ្វើឲ្យវិជ្ជាជីវៈវិស្វកម្មកាន់តែល្អ ដើម្បីការពារកិត្តិយសសេចក្តីថ្លៃថ្នូរដល់វិស្វករ និងរួមចំណែកថែរក្សាលើកស្ទួយអត្តសញ្ញាណជាតិ។
ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាគណៈវិស្វករកម្ពុជាមានប្រសាសន៍លើកឡើងបែបនេះ នាឳកាសដឹកនាំកិច្ចប្រជុំលើកដំបូងជាមួយក្រុមប្រឹក្សាគណៈវិស្វករកម្ពុជា នាថ្ងៃ ច័ន្ទ ១២ កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹង ថ្ងៃទី២៦ ខែកុម្ភៈ ឆ្នាំ២០១៨ នៅទីស្តីការក្រសួងការងារ។ ឯកឧត្តមបញ្ជាក់ថា វិស្វករគ្រប់មុខជំនាញវិជ្ជាជីវៈវិស្វកម្ម ត្រូវតែមកចុះបញ្ជីនៅគណៈវិស្វករកម្ពុជា ដែលជាបុព្វលក្ខខ័ណ្ឌ ព្រោះបើមិនមកចុះបញ្ជី បានន័យថាវិស្វករនោះមិនអាចទទួលគោរមងារជាវិស្វករអាជីពជាតិ វិស្វករអាស៊ាន និងវិស្វករអាជីពឆ្នើមអាស៊ានបានទេ ព្រោះមានតែស្ថាប័នគណៈវិស្វករកម្ពុជានេះទេ ដែលអាចផ្តល់គោរមងារជាវិស្វករអាជីព ដែលច្បាប់ផ្តល់សិទ្ធិឲ្យជាធរមាន។
ទន្ទឹមនឹងនេះ គណៈវិស្វករកម្ពុជាក៏ជាអ្នកវាយតម្លៃ និងធ្វើបែបបទសម្រាប់ទទួលគោរមងារបន្ថែមជាវិស្វករអាស៊ាន និងវិស្វករអាជីពឆ្នើមអាស៊ានបន្ថែមទៀត។ ក្នុងពេលបច្ចុប្បន្ន គណៈវិស្វករកម្ពុជាបានកែសម្រួលសមាសភាពក្រុមប្រឹក្សាគណៈវិស្វករកម្ពុជាឡើងវិញតាមព្រះរាជក្រឹត្យលេខ នស/រកត/១២១៧/១២៧៥ ចុះថ្ងៃទី២១ ខែធ្នូ ឆ្នាំ២០១៧ ដែលមានឯកឧត្តម អ៊ិត សំហេង ជាប្រធាន និងឯកឧត្តម លោកជំទាវ អ្នកឧកញ៉ា ជាអនុប្រធាន និងជាសមាជិកក្រុមប្រឹក្សាគណៈវិស្វករកម្ពុជា ដែលត្រូវទទួលខុសត្រូវចំពោះរាជរដ្ឋាភិបាល ដែលមានសម្តេចអគ្គមហាសេនាបតីតេជោនាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានកិត្តិយសដ៏ខ្ពង់ខ្ពស់នៃគណៈវិស្វករកម្ពុជា ហើយមានតួនាទីសំខាន់ដូចខាងក្រោម៖
- អនុម័តគោលនយោបាយ យុទ្ធសាស្រ្ត ផែនការ សកម្មភាព បទបញ្ជាផ្ទៃក្នុង និងក្រមសីលធម៌របស់គណៈវិស្វករកម្ពុជា
- តាមដានត្រួតពិនិត្យដំណើរការប្រព្រឹត្តទៅរបស់គណៈវិស្វករកម្ពុជា
- ផ្តល់យោបល់ដល់អគ្គលេខាធិការដ្ឋានគណៈវិស្វករកម្ពុជា
- សម្របសម្រួល និងដោះស្រាយវិវាទផ្សេងៗរបស់គណៈវិស្វករកម្ពុជា
- ផ្តល់យោបល់ក្នុងការចុះបញ្ជីវិស្វករអាជីពជាតិ និងអន្តរជាតិ ការលើកទឹកចិត្ត និងដាក់ពិន័យ។
ភារកិច្ចមួយទៀតជាការចាំបាច់ ក្រុមប្រឹក្សាគណៈវិស្វករកម្ពុជាត្រូវប្រជុំយ៉ាងតិចក្នុងមួយឆ្នាំម្ដង។ ក្នុងករណីចាំបាច់ ប្រធានអាចកោះប្រជុំវិសាមញ្ញបាន។ ឯកឧត្តមរដ្ឋមន្ត្រីបានសំណូមពរមួយចំនួនដល់សមាជិក សមាជិកា នៃក្រុមប្រឹក្សាគណៈវិស្វករកម្ពុជាដូចមានខាងក្រោម៖ ត្រូវយកចិត្តទុកដាក់នូវភារកិច្ច ដែលរាជរដ្ឋាភិបាលប្រគល់ជូន ក្នុងការជួយជំរុញឲ្យគណៈវិស្វករកម្ពុជាប្រព្រឹត្តទៅដោយរលូន និងជួយដោះស្រាយនូវសំណូមពរចាំបាច់ទាំងឡាយរបស់អង្គភាពប្រតិបត្តិនេះ ក្នុងនោះរួមមាន៖ - ក្រសួងស្ថាប័នពាក់ព័ន្ធ ដែលបានបញ្ជូនមន្រ្តីមានបទពិសោធន៍ខាងវិស័យជំនាញវិស្វកម្មមកចូលរួមក្នុងសមាសភាពក្រុមប្រឹក្សាគណៈវិស្វករកម្ពុជា សូមមេត្តាជួយបង្កលក្ខណៈងាយស្រួលក្នុងការអញ្ជើញចូលរួមប្រជុំក្នុងក្រុមប្រឹក្សាគណៈវិស្វករកម្ពុជា និងមេត្តាជួយសម្រួលដល់មន្រ្តីទាំងនោះ ដែលត្រូវចូលរួមវាយតម្លៃសម្បទាវិជ្ជាជីវៈវិស្វកម្មដល់បេក្ខជនវិស្វករអាជីពជាតិ វិស្វករអាស៊ាន និងវិស្វករអាជីពឆ្នើមអាស៊ាន - អភិបាលនៃគណៈអភិបាលរាជធានី-ខេត្ត ដែលបញ្ជូនវិស្វករដើម្បីបង្កើតក្រុមប្រឹក្សាគណៈវិស្វកររាជធានី-ខេត្ត ត្រូវជ្រើសរើសវិស្វករអាជីព និងវិស្វករចុះបញ្ជីដើម្បីបង្កើតក្រុមប្រឹក្សារាជធានី-ខេត្តរបស់ខ្លួន (បញ្ជាក់កន្លងមកខេត្តមួយចំនួនបានបញ្ជូនវិស្វករជាប្រធាន អនុប្រធាននិងសមាជិកក្រុមប្រឹក្សាគណៈវិស្វកររាជធានី-ខេត្ត ដោយវិស្វករទាំងនោះដែលមិនទាន់បានមកចុះបញ្ជីនៅគណៈ វិស្វករកម្ពុជាផង)។
ក្នុងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាប្រធានកិត្តិយសដ៏ខ្ពង់ខ្ពស់របស់គណៈវិស្វករកម្ពុជា និងក្នុងនាមឯកឧត្តមរដ្ឋមន្ត្រី ផ្ទាល់ជាប្រធានក្រុមប្រឹក្សាគណៈ វិស្វករកម្ពុជា ឯកឧតុ្តមបានកោតសរសើរដល់គណៈវិស្វករកម្ពុជាដែលបានខិតខំបំពេញភារកិច្ចរបស់ខ្លួនកន្លងមកប្រកបដោយផ្លែផ្កា ក្នុងនោះបានទទួលវិស្វករចុះបញ្ជីវិស្វករ នៅគណៈវិស្វករកម្ពុជាគិតត្រឹមថ្ងៃទី៣១ ខែធ្នូ ឆ្នាំ២០១៧ មានចំនួនៈ ៣០៤៥នាក់។ ចំពោការងារ និងទិសដៅដែលត្រូវអនុវត្តនៅពេលខាងមុខរបស់គណៈវិស្វករកម្ពុជារួមមាន៖
- កែសម្រួលលិខិតបទដ្ឋានគតិយុត្ត និងបង្កើតលិខិតបទដ្ឋានផ្សេងៗដើម្បីសម្របសម្រួលក្នុងការធ្វើ សមាហរណកម្មអាស៊ាន
- រៀបចំនីតិវិធីក្នុងការវាយតម្លៃវិស្វករតាមស្តង់ដារអាស៊ាន និងនីតិវិធីវាយតម្លៃដើម្បីឲ្យមានការទទួលស្គាល់វិស្វករបរទេស
- កសាងឯកសារគតិយុត្ត វិស្វកម្មឲ្យមានលក្ខណៈសមស្របទៅនឹងឯកសារដែលប្រើប្រាស់ក្នុងអាស៊ាន
- ជំរុញឲ្យវិស្វករជាតិចូលរួមជាអតិបរមាក្នុងសន្និសីទ និងសិក្ខាសាលាថ្នាក់ជាតិ និងអន្តរជាតិដើម្បីឲ្យ ទទួលបានបទពិសោធន៍ និងចំណេះដឹងថ្មីៗបន្ថែមទៀត
- ត្រៀមបើកវគ្គបណ្តុះបណ្តាលដែលទាក់ទងទៅនឹងវិស័យវិស្វកម្ម តាមផែនការយុទ្ធសាស្ត្រ ៣ឆ្នាំរំកិល ដែលបានគ្រោងទុក
- ត្រៀមរៀបចំកិច្ចប្រជុំរបស់ក្រុមប្រឹក្សា គណៈវិស្វករកម្ពុជាអាណត្តិទី២
- ជំរុញការផ្សព្វផ្សាយឲ្យបានទូលំទូលាយដល់វិស្វករជាតិ និងបរទេស ដែលកំពុងប្រកបវិជ្ជាជីវៈវិស្វកម្មនៅក្នុងព្រះរាជាណាចក្រកម្ពុជា ឲ្យមកបំពេញបែបបទសុំចុះបញ្ជីវិស្វករ នៅគណៈវិស្វករកម្ពុជា ដើម្បីឲ្យស្របតាមច្បាប់នៃព្រះរាជាណាចក្រកម្ពុជា
- ជំរុញការចុះបញ្ជីយុវវិស្វករអាស៊ាន និងវិស្វករអាស៊ានឲ្យបានច្រើនទៅតាមការគ្រោងទុក
- ចុះត្រួតពិនិត្យ តាមដាន និងវាយតម្លៃលើការចុះបញ្ជីវិស្វករជាតិ វិស្វករបរទេស នៅតាមបណ្តាក្រុមហ៊ុន រោងចក្រ សហគ្រាសនានា ក្នុងព្រះរាជាណាចក្រកម្ពុជា
- ចុះបង្កើតក្រុមប្រឹក្សាគណៈវិស្វកររាជធានី ខេត្ត ឲ្យបានសម្រេចទៅតាមផែនការដែលបានគ្រោងទុក
- ជំរុញការចុះបញ្ជីវិស្វករអាជីព វិស្វករអាស៊ាន និងវិស្វករអាជីពឆ្នើមអាស៊ានឲ្យបានចំនួនច្រើនបន្ថែមទៀត។
