ក្រសួងការងារបើកកិច្ចប្រជុំបូកសរុបលទ្ធផលប្រចាំឆ្នាំរបស់ក្រុមអធិការកិច្ចអន្ដរក្រសួងក្នុងវិស័យកម្មន្ដសាល

សេវាសាធារណៈ

ក្រសួងការងារបើកកិច្ចប្រជុំបូកសរុបលទ្ធផលប្រចាំឆ្នាំរបស់ក្រុមអធិការកិច្ចអន្ដរក្រសួងក្នុងវិស័យកម្មន្ដសាល

សុក្រ, 10 មករា 2025 18:17 | 598 times | Print | Email

Image Gallery

(ភ្នំពេញ)៖ នាព្រឹកថ្ងៃទី១០ ខែមករា ឆ្នាំ២០២៥ នាទីស្តីការក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម សោម ចំណាន រដ្ឋលេខាធិការ ក្នុងនាមជាតំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមការងាររៀបចំក្រុមអធិការកិច្ចអន្តរក្រសួង បានដឹកនាំកិច្ចប្រជុំក្រុមការងារអធិការកិច្ចអន្តរក្រសួងក្នុងវិស័យកម្មន្ដសាល ដោយមានការចូលរួមពីតំណាងក្រសួងបរិស្ថាន និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍។

កិច្ចប្រជុំនេះមានគោលបំណងពិនិត្យ និងវាយតម្លៃលើលទ្ធផលការងារចុះធ្វើអធិការកិច្ចអន្តរក្រសួងក្នុងវិស័យកម្មន្តសាលក្នុងឆ្នាំ២០២៤ និងពិភាក្សាអំពីផែនការណ៍ការងារសម្រាប់ឆ្នាំ២០២៥ ដែលជាការអនុវត្តតាមអនុសាសន៍ដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីថ្លែងក្នុងវេទិការាជរដ្ឋាភិបាល-ផ្នែកឯកជនលើកទី១៨ នាថ្ងៃទី២៩ ខែមីនា ឆ្នាំ២០១៩ និងអនុសាសន៍ដ៏ខ្ពង់ខ្ពស់បំផុតរបស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងវេទិការាជរដ្ឋាភិបាល-ផ្នែកឯកជនលើកទី១៩ នាថ្ងៃទី១៣ ខែវិច្ឆិកា ឆ្នាំ២០២៣។

នៅក្នុងឆ្នាំ២០២៤ ក្រុមអធិការកិច្ចអន្តរក្រសួងក្នុងវិស័យកម្មន្តសាល បានចុះធ្វើអធិការកិច្ចផ្តោតតែលើរោងចក្រ សហគ្រាសផ្នែកវាយនភណ្ឌ កាត់ដេរ ផលិតស្បែកជើង ផលិតផលិតផលធ្វើដំណើរ និងកាបូប មានទីតាំងនៅរាជធានីភ្នំពេញ ចំនួន ១១៨ ដោយចាប់ផ្តើមពីថ្ងៃទី៣០ ខែតុលា ដល់ថ្ងៃទី១១ ខែធ្នូ ឆ្នាំ២០២៤។ នេះគឺជាការចាប់ផ្តើមដ៏ល្អប្រសើរក្នុងការអនុវត្តយន្តការអធិការកិច្ចថ្មីដែលជាកំណែទម្រង់ដ៏មុតស្រួចរបស់រាជរដ្ឋាភិបាលដើម្បីពង្រឹងភាពប្រកួតប្រជែងរបស់កម្ពុជា។

គួរបញ្ជាក់ផងដែរថា នៅក្នុងយន្តការថ្មីនេះ ក្រសួងកាងារ និងបណ្តុះបណ្តាលវិជ្ជាជីវៈបានទទួលអាណត្តិពីរាជរដ្ឋាភិបាលក្នុងការរៀបចំ និងដឹកនាំក្រុមអធិការកិច្ចអន្តរក្រសួងចំនួន ៤ វិស័យ មកដល់ពេលនេះ រួមមាន ១-ក្រុមអធិការកិច្ចអន្តរក្រសួងក្នុងវិស័យកម្មន្តសាល ដែលមានសមាសភាពក្រសួងការងារ និងបណ្តុះបណ្តាលវិជ្ជាជីវៈ, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនាវានុវត្តន៍, ក្រសួងបរិស្ថាន, ២-ក្រុមអធិការកិច្ចអន្តរក្រសួងក្នុងវិស័យទេសចរណ៍ ដែលមានសមាសភាពក្រសួងការងារ និងបណ្តុះបណ្តាលវិជ្ជាជីវៈ, ក្រសួងទេសចរណ៍, ក្រសួងសុខាភិបាល, ក្រសួងបរិស្ថាន, ៣-ក្រុមអធិការកិច្ចអន្តរក្រសួងក្នុងវិស័យកសិកម្ម ដែលមានសមាសភាពក្រសួងការងារ និងបណ្តុះបណ្តាលវិជ្ជាជីវៈ, ក្រសួងកសិកម្ម រុក្ខាប្រមាញ់ និងនេសាទ, ក្រសួងបរិស្ថាន, និង ៤-ក្រុមអធិការកិច្ចអន្តរក្រសួងក្នុងវិស័យសំណង់ ដែលមានសមាសភាពក្រសួងការងារ និងបណ្តុះបណ្តាលវិជ្ជាជីវៈ និងក្រសួងរៀបចំដែនដី នគរូបនីយកម្ម និងសំណង់៕

#MLVT #HENGSour