ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
បន្ទាប់ពីអញ្ជើញជាអធិបតីបើកសន្និសីទនៃអង្គការសហព័ន្ធវិស្វកម្មអាស៊ានលើកទី៤០ ដែលធ្វើឡើងនៅសណ្ឋាគារសុខា រាជធានីភ្នំពេញ នាព្រឹកថ្ងៃទី៦ ខែធ្នូ ឆ្នាំ២០២២ ឯកឧត្តមបណ្ឌិត អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានផ្តល់កិត្តិយសដល់ប្រធានស្ថាប័ន អង្គការសហព័ន្ធវិស្វកម្មអាស៊ាន ចូលជួបសម្តែងការគួរសម និងពិភាក្សាការងារអំពីវឌ្ឍនភាពនៃកិច្ចខិតខំប្រឹងប្រែងរបស់អង្គការសហព័ន្ធវិស្វកម្មអាស៊ាន ដែលបានសម្រេចបាននាពេលកន្លងមក។
នាឱកាសនោះ ឯកឧត្តមរដ្ឋមន្ត្រី បានកោតសរសើរដល់វិស្វកម្មអាស៊ានដែលបានចូលរួមចំណែកធ្វើឱ្យមានការរីកចម្រើនផ្នែកធនធានមនុស្ស ជាពិសេសផ្នែកវិស្វកម្មនេះតែម្តង។ អង្គការសហព័ន្ធវិស្វកម្មអាស៊ាន ក៏បានរួមចំណែកដាក់ចេញនូវយុទ្ធសាស្ត្រថ្មីៗយ៉ាងច្រើន ដើម្បីឆ្លងតបទៅនឹងការវិវត្តន៍យ៉ាងឆាប់រហ័សរបស់បច្ចេកវិទ្យា និងសេដ្ឋកិច្ចសង្គម។
ឯកឧត្តមបណ្ឌិត អុិត សំហេង ចង់ឃើញអង្គការសហព័ន្ធវិស្វកម្មអាស៊ាន ដើរតួនាទីកាន់តែសំខាន់ក្នុងការចូលរួមអភិវឌ្ឍន៍វិស័យវិស្វកម្ម និង ចង់ឃើញជំនាញវិស្វករនៃបណ្តាប្រទេសទាំងអស់ក្នុងតំបន់អាស៊ានមានចំនួនកាន់តែច្រើន។
តំណាងឱ្យស្ថាប័នវិស្វករ លោក Bambang Goeritno អគ្គលេខាធិការនៃវិទ្យាស្ថានវិស្វករឥណ្ឌូនេស៊ី បានកោតសរសើរចំពោះការដឹកនាំរបស់កម្ពុជាដែលបានធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០-៤១ ទទួលបានជោគជ័យយ៉ាងត្រចះត្រចង់ និងក៏ដូចជាបានរៀបចំ សន្និសីទនៃអង្គការសហព័ន្ធវិស្វកម្មអាស៊ានលើកទី៤០នេះ បានយ៉ាងល្អ។
ខណៈពេល ធ្វើជាម្ចាស់ផ្ទះសន្និសីទនៃអង្គការសហព័ន្ធវិស្វកម្មអាស៊ានលើកទី៤១ នាឆ្នាំ២០២៣ខាងមុខ ភាគីឥណ្ឌូនេស៊ីក៏បានអញ្ជើញឯកឧត្តមរដ្ឋមន្តី្រផ្តល់កិត្តិយសចូលរួមក្នុងសន្និសិទនេះផងដែរ។
ឆ្លើយតបទៅនឹងសំណើនេះ ឯកឧត្តមរដ្ឋមន្ត្រី នឹងដឹកនាំគណៈប្រតិភូកម្ពុជាដើម្បីចូលរួមតាមការអញ្ជើញរបស់ភាគីជាម្ចាស់ផ្ទះឥណ្ឌូនេស៊ី។
ឯកឧត្តមរដ្ឋមន្ត្រី បានស្នើឱ្យមានការគាំទ្រពីតំណាងស្ថាប័នវិស្វកម្មអាស៊ាន ក្នុងការផ្តួចផ្តើមឱ្យមានការរៀបចំ សិក្ខាសាលា វិស្វករឌីជីថលអាស៊ាន ដែលកម្ពុជាអាចធ្វើជាម្ចាស់ផ្ទះរៀបចំ ក្នុងអំឡុងខែមីនា ឆ្នាំ២០២៣ ដើម្បីជាការចែករំលែកនូវបទពិសោធន៍ និងព័ត៌មានពីគ្នាទៅវិញទៅមកឲ្យកាន់តែប្រសើរបន្ថែមទៀត។ ជាមួយនឹងនេះដែរ តំណាងស្ថាប័នវិស្វកម្មអាស៊ានបានគាំទ្រយ៉ាងពេញទំហឹងចំពោះគំនិតផ្តួចផ្តើម របស់ឯកឧត្តមរដ្ឋមន្ត្រីក្នុងការរៀបចំសិក្ខាសាលា វិស្វករឌីជីថលអាស៊ាន ដែលកម្ពុជាធ្វើជាម្ចាស់ផ្ទះ៕
