ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
នៅរសៀលថ្ងៃទី២៧ ខែមិថុនា ឆ្នាំ២០១៧ ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និង គណៈប្រតិភូ បានអញ្ជើញជួបពិភាក្សាការងារជាមួយលោក Jian Chen អនុប្រធាននាយកដ្ឋានធនធានមនុស្ស និងសន្តិសុខសង្គម នៅទីក្រុង Nanjing ខេត្តជាងស៊ូ សាធារណរដ្ឋប្រជាមានិតចិន។ ក្នុងជំនួបនោះភាគីមិត្តចិន បានសម្តែងនូវការស្វាគមន៍យ៉ាងកក់ក្តៅចំពោះគណៈប្រតិភូកម្ពុជា និងបានជម្រាបជូនគណៈប្រតិភូថា ខេត្តជាងស៊ូ ជាខេត្តមួយឈានមុខគេក្នុងប្រទេសចិន ដែលមានបុគ្គលិក និងកម្មករច្រើន ដូចនេះនាយកដ្ឋានលោកមានភារកិច្ចសំខាន់ៗជាច្រើនផ្តោតលើការការពារផលប្រយោជន៍កម្មករ និងផ្តល់ការបណ្តុះបណ្តាលមុខជំនាញបច្ចេកទេសដល់កម្មករ ដោយផ្តោតលើយន្តការមួយចំនួនរួមមាន ការធ្វើកិច្ចសន្យាការងារ ការជំរុញកិច្ចសហការជាមួយសហជីពដើម្បីមានទំនាក់ទំនងវិជ្ជាជីវៈប្រកបដោយនិរន្តរភាព ការផ្សព្វផ្សាយនូវសហគ្រាសដែលមានស្នាដៃល្អ ដើម្បីបង្កើតបរិយាយកាស ទំនាក់ទំនងល្អពីគ្រប់ភាគីនៅតាមគ្រប់ទីកន្លែង ការធ្វើអធិការកិច្ចការងារ និងការដោះស្រាយវិវាទការងារ នៅពេលទទួលពាក្យបណ្តឹងទាក់ទងនឹងប្រាក់ឈ្នួល ឬលក្ខខណ្ឌការងារផ្សេងៗទៅតាមដំណាក់កាល មុនពេលបញ្ជូនទៅតុលាការ។ ទន្ទឹមនោះបានយកចិត្តទុកដាក់បណ្តុះបណ្តាលធនធានមនុស្សដើម្បីឆ្លើយតបបានទៅតាមតម្រូវការទីផ្សាការងារ ដោយសហការជាមួយវិទ្យាស្ថាននានាជ្រើសរើសសិស្សឱ្យចូលរៀននូវមុខជំនាញបច្ចេកទេស សហការជាមួយផ្នែកឯកជនផ្តល់ការបណ្តុះបណ្តាលមុខជំនាញបច្ចេកទេសរយៈពេលខ្លី ដើម្បីរកការងារធ្វើបានលឿន និងសហការជាមួយផ្នែកឧស្សាហកម្មផ្ទាល់ដើម្បីផ្តល់ការបណ្តុះបណ្តាលនៅនឹងកន្លែងធ្វើការ។ ឯកឧត្តមបណ្ឌិតរដ្ឋមន្រ្តី បានថ្លែងនូវការអរគុណចំពោះរដ្ឋាភិបាលចិន ដែលបានអញ្ជើញឯកឧត្តម និងគណៈប្រតិភូមកទស្សនកិច្ចនៅទីក្រុង Nanjing ខេត្តជាងស៊ូ នាពេលនេះ ដែលបានបង្ហាញនូវចំណងមិត្តភាពរវាងប្រទេសយើងទាំងពីរដែលមានតាំងពីជំនាន់សម្តេចព្រះនរោត្តម សីហនុ ព្រះបរមរនកោដ្ឋ ហើយបានបន្តដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា រហូតដល់សព្វថ្ងៃកាន់តែជិតស្និតថែមទៀត ដែលនេះជាទំនាក់ទំនងយុទ្ធសាស្រ្តគ្រប់ជ្រុងជ្រោយសម្រាប់ប្រទេសទាំងពីរ។ ទំនាក់ទំនងនេះហើយ ដែលបានជំរុញឱ្យអ្នកវិនិយោគចិន បានទៅវិនិយោគនៅកម្ពុជាកាន់តែច្រើនឡើងនៅកម្ពុជា រួមជាមួយនឹងការអភិវឌ្ឍធនធានមនុស្សផងដែរ។ ជាក់ស្តែងក្រុមហ៊ុនចិននៅខេត្តជាងស៊ូ បានទៅវិនិយោគបង្កើតតំបន់សេដ្ឋកិច្ចនៅខេត្តព្រះសីហនុ ដែលបច្ចុប្បន្នមានរោងចក្រចំនួនជាង ១០០ និងកម្មករប្រមាណជិត ២ ម៉ឺននាក់ និងបានបង្កើតមជ្ឈមណ្ឌលបណ្តុះបណ្តាលបច្ចេកទេស និងវិជ្ជាជីវៈមិត្តភាពកម្ពុជា- ចិន ដែលកំពុងតែសាងសង់ជិតរួចរាល់នៅពេលខាងមុខ។ ចំពោះវិស័យការងារ និងបណ្តុះបណ្តាលវិជ្ជាជីវៈ តួនាទី និងភារកិច្ចនៃស្ថាប័នទាំងពីរមានសកម្មភាពប្រហាក់ប្រហែលគ្នាគឺធ្វើយ៉ាងណាការពារផលប្រយោជន៍កម្មករ ពង្រឹងសុខដុមនីយកម្មទំនាក់ទំនងវិជ្ជាជីវៈ តាមរយៈការធ្វើអធិការកិច្ច ការដោះស្រាយវិវាទ ស្របតាមច្បាប់ស្តីពីការងារ និងច្បាប់ស្តីពីសហជីព។ ទន្ទឹមនោះបានផ្តល់ការបណ្តុះបណ្តាលបច្ចេកទេស និងវិជ្ជាជីវៈ ឱ្យអាចឆ្លើយតបបានទៅនឹងតម្រូវការទីផ្សារការងារ ដើម្បីប្រែក្លាយទៅជាឧស្សាហកម្មដែលមានជំនាញខ្ពស់ និងប្រាក់ឈ្នួលខ្ពស់ ស្របតាមផែនការសកម្មភាពជាតិស្តីពីការអបរំ បណ្តុះបណ្តាលបច្ចេកទេស និងវិជ្ជាជីវៈឆ្នាំ២០១៧-២០២៥ ដែលរាជរដ្ឋាភិបាលទើបអនុម័តនាពេលថ្មីៗនេះ។ ឯកឧត្តមរដ្ឋមន្រ្តី ក៏បានអញ្ជើញថ្នាក់ដឹកនាំ និងគណៈប្រតិភូនាយកដ្ឋានធនធានមនុស្ស និងសន្តិសុខសង្គម នៅទីក្រុង Nanjing ខេត្តជាងស៊ូ ទៅបំពេញទស្សនកិច្ចនៅកម្ពុជា ដើម្បីបានផ្លាស់ប្តូរនូវបទពិសោធន៍ និងពង្រឹងទំនាក់ទំនងកាន់តែជិតស្និតថែមទៀត។
