ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
នៅទីស្តីការក្រសួង រសៀលថ្ងៃទី០៧ ខែមិថុនា ឆ្នាំ២០១៧ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជា និងលោកជំទាវ Claire Van der Vaeren អ្នកសម្របសម្រួលអង្គការសហប្រជាជាតិ បានអញ្ជើញបើកកិច្ចប្រជុំគណៈកម្មការវាយតម្លៃគម្រោងនៃកម្មវិធីរួមជាមួយអង្គការសហប្រជាជាតិស្តីពីមុខរបរ និងការងារសម្រាប់យុវជននៅប្រទេសកម្ពុជា។ គោលបំណងនៃកិច្ចប្រជុំនេះ គឺពិនិត្យភាពត្រឹមត្រូវផ្នែកបច្ចេកទេស នៃឯកសារគម្រោងក្នុងចំណោម ភាគីពាក់ព័ន្ធសំខាន់ៗ ដូចជាភ្នាក់ងារអង្គការសហប្រជាជាតិ ដែលជាជំហានចាំបាច់ដើម្បីរៀបចំឯកសារឲ្យបានល្អមុនដាក់ជូនជាផ្លូវការទៅទីភ្នាក់ងារសហប្រតិបត្តិការអភិវឌ្ឍន៏របស់ប្រទេសស្វីស។ ជាមួយគ្នានេះ កិច្ចប្រជុំក៏នឹង៖ ១-បង្ហាញសេចក្តីព្រាងនៃឯកសារគម្រោង និងផែនការអនុវត្ត ២-ប្រមូលធាតុចូលនានា ដើម្បីធ្វើបច្ចុប្បន្នភាពឯកសារគម្រោង ក្នុងករណីចាំបាច់ ៣-ពិនិត្យអនុម័តលើឯកសារគម្រោង ក្រោមជំនួយរបស់ទីភ្នាក់ងារស្វីសសម្រាប់កិច្ចសហប្រតិបត្តិការ និងការអភិវឌ្ឍ (SDC) សហការជាមួយអង្គការ ILO, UNDP, UNESCO, UNECEF និង UNV គម្រោងនេះមានគោលបំណងផ្តល់ឱកាសការងារសមរម្យ និងផលិតភាព ដល់យុវជនកម្ពុជា ជាពិសេសក្រុមជួបការលំបាក និងងាយរងគ្រោះ។គម្រោងនេះ គឺទស្សនវិស័យវែងឆ្ងាយរបស់អង្គការសហប្រជាជាតិនៅកម្ពុជាដើម្បីពង្រឹងកិច្ចសហប្រតិបត្តិការ និងភាពស៊ីចង្វាក់គ្នា រវាងភ្នាក់ងាររបស់ខ្លួន និងដៃគូអភិវឌ្ឍនានា សំដៅធានាថាយុវជនវ័យក្មេង ត្រូវបានបំពាក់នូវលក្ខខណ្ឌត្រឹមត្រូវ និងជំនាញពាក់ព័ន្ធ ដើម្បីចូលក្នុងទីផ្សារការងារដែលនឹងឱ្យតម្លៃនិងការពារពួកគេ ដែលនឹងចូលរួមអភិវឌ្ឍប្រទេសកម្ពុជាឱ្យការតែរីកចម្រើង និងស្របតាមគោលដៅអភិវឌ្ឍ ប្រកបដោយចីរភាព។ ទន្ទឹមនឹងនេះ គម្រោងនេះ ត្រូវបានបង្កើតដើម្បីជួយរាជរដ្ឋាភិបាលកម្ពុជាក្នុងការដោះស្រាយបញ្ហាប្រឈមសំខាន់ៗនានាទាក់ទងនឹងមុខរបរ និងការងាររបស់យុវជននៅកម្ពុជា ដោយអនុលោមតាមយុទ្ធសាស្ត្រចតុកោណរបស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍជាតិ (២០១៤-២០១៨)។ គម្រោងនេះ ក៏ជួយគាំទ្រ ការអនុវត្តរបៀបវារៈសម្រាប់ការអភិវឌ្ឍប្រកបដោយចីរភាពឆ្នាំ២០៣០ ជាពិសេសគោលដៅទី៨ ដើម្បីលើកកម្ពស់កំណើនសេដ្ឋកិច្ចប្រកបដោយបរិយាប័ន្ននិងចីរភាព និងមុខរបរនិងការងារពេញលេញនិងផលិតភាព និងការងារសមរម្យសម្រាប់ទាំងអស់គ្នា។ គម្រោងនេះ នឹងត្រូវដាក់ឱ្យអនុវត្តជាបីដំណាក់កាលគឺ៖ -ដំណាក់កាលទី១ (ខែកញ្ញា ឆ្នាំ២០១៧ ដល់ខែសីហា ឆ្នាំ២០១៩)៖បង្កើត និងចូលរួមផ្តួចផ្តើមគាំទ្រដល់យុវជន យុវនារីវ័យក្មេងក្នុងដំណើរការស្វែងរកការងារសមរម្យ។ -ដំណាក់កាលទី២ (ឆ្នាំ២០១៩ ដល់ឆ្នាំ២០២៣)៖ សម្រាំងនូវក្របខ័ណ្ឌគោលនយោបាយថ្នាក់ជាតិ និងការពង្រីកនៃការគាំទ្រយន្តការជំនាញដើម្បីត្រៀមរៀបចំយុវជន យុវនារីវ័យក្មេងចូលក្នុងកំលំាងពលកម្ម។ -ដំណាក់កាលទី៣ (ឆ្នាំ ២០២៤ ដល់ឆ្នាំ២០២៨)៖ ប្រគល់គម្រោងជួនរាជរដ្ឋាភិបាលកម្ពជាដើម្បីបន្តអនុវត្ត និងវាយតម្លៃទៅលើគម្រោងដើម្បីប្រៀបធៀបជាមួយនឹងគោលដៅដែលបានកំណត់ទុក។
