ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាល វិជ្ជាជីវៈ បានអនុញ្ញាតឱ្យ លោក ណូដា មីណូរុ ប្រធានក្រុមប្រឹក្សាភិបាល នៃក្រុមហ៊ុនកាកេហាស៊ិអិនធើណេសិនណល និងប៊ីហ្សេនេស រួមទាំងគណៈប្រតិភូមកពីប្រទេសជប៉ុន ចូលជួបសម្តែងការគួរសម និងស្វែងយល់ពីសក្តានុពលនៃធនធានមនុស្សនៅកម្ពុជា ជាពិសេសកម្មវិធីបញ្ជូនសិក្ខាកាមកម្ពុជាទៅហាត់ការនៅប្រទេសជប៉ុន នាព្រឹកថ្ងៃទី៣ ខែវិច្ឆិកា ឆ្នាំ២០១៦ នៅទីស្តីការក្រសួង។ នៅក្នុងជំនួបនេះឯកឧត្តមរដ្ឋមន្រ្តីបានជម្រាបជូនភ្ញៀវពីការវិវត្តន៍រីកចំរើន និងស្ថានភាពបច្ចុប្បន្ននៅកម្ពុជាដែលមានសេ្ថរភាពនយោបាយល្អប្រសើរ កំណើនសេដ្ឋកិច្ច ពាណិជ្ជកម្ម និងវិនិយោគទុនគួរឱ្យកត់សំគាល់។ កិច្ចសហប្រតិបត្តការដ៏ល្អប្រសើររវាងជប៉ុន នឹងកម្ពុជា ដែលជានិច្ចកាល ជប៉ុនបានបន្តជួយគាំទ្រលើគ្រប់វិស័យ ក្នុងនោះកិច្ចសហប្រតិបត្តិការជាច្រើនជាមួយក្រសួងផងដែរ ជាពិសេសការផ្តល់ការជួយបណ្តុះបណ្តាលវិជ្ជាជីវៈ និងការផ្តល់ឱកាសជូនដល់ពលករកម្ពុជាទៅកម្មសិក្សាជំនាញនៅជប៉ុន ដែលរហូតមកដល់ពេលនេះបានប្រមាណជាង ៣៥០០នាក់។ ជាមួយគ្នានេះដែរឯកឧត្តមក៏បានជម្រាបជូនពីគោលនយោបាយអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ដែលបានធានាបាននូវសុខដុមនីយកម្មទំនាក់ទំនងវិជ្ជាជីវៈ និងការបង្កើនបាននូវការបណ្តុះបណ្តាលធនធានមនុស្សផ្នែកជំនាញបច្ចេកទេសវិជ្ជាជីវៈ។ ភាគីជប៉ុនបានសម្តែងនូវចំណាប់អារម្មណ៍ជាខ្លាំងចំពោះសក្តានុពលនៅកម្ពុជា ជាពិសេសកម្លាំងពលកម្មវ័យក្មេង។ តបតាមសំណើររបស់ភាគីក្រុមហ៊ុនជប៉ុន ឯកឧត្តមរដ្ឋមន្រ្តី បានឯកភាពឱ្យរៀបចំជាក្របខណ្ឌអនុស្សរណៈនៃការយោគយល់គ្នារវាងក្រុមហ៊ុន និងក្រសួងដើម្បីបង្កើនកិច្ចសហប្រតិការលើការជ្រើសរើស គ្រប់គ្រង និងបញ្ជូនកម្មសិក្សាការីកម្ពុជាទៅហាត់ការនៅជប៉ុនឱ្យបានកាន់តែច្រើន ដែលបច្ចុប្បន្នក្រុមហ៊ុននេះទើបមានកម្មសិក្សាការីកម្ពុជាតែ ៤៤នាក់ប៉ុណ្ណោះ។
