ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំប្រតិភូក្រសួងចូលរួមសន្និសិត ស្ដីពីផលលាភប្រជាសាស្ត្រនិងការងារសមរម្យ នៅទីស្នាក់ការកណ្ដាលអង្គការសហប្រជាជាតិ ទីក្រុងញូយ៉ក។ ថ្លែងទៅកាន់អង្គសន្និសិតនៅព្រឹកថ្ងៃទី០១ មិថុនា នេះ ឯកឧត្តមបានគូសបញ្ជាក់អំពីភាពសវិជ្ជមាននៃផលលាភនិងប្រជារាសាស្ត្រដែលកម្ពុជាមានប្រជាជនវ័យក្មេងច្រើន និងមានអាត្រាកំណើនប្រជាជនមធ្យមមួយដែលអាចគ្រប់គ្រងបាន ដែលជាហេតុធ្វើឱ្យកម្ពុជាអាចផ្គត់ផ្គង់កម្លាំងពលកម្មគ្រប់គ្រាន់ទៅក្នុងសង្វាក់ផលិតកម្ម និងដំណើរការអភិវឌ្ឍសេដ្ឋកិច្ច។ ទន្ទឹមនឹងនេះឯកឧត្តមក៏បានបង្ហាញពីចំណុចប្រឈមនៃរចនាសម្ព័ន្ធប្រជាសាស្ត្ររបស់កម្ពុជា ដែលមានលក្ខណៈខុសពីប្រទេសដទៃ ដោយកម្ពុជាខ្វះមនុស្សដែលមានវ័យកណ្ដាលអាយុ៤០ទៅ៥០ឆ្នាំ ជាស្ពានផ្ទេរចំណេះដឹងនិងចំណេះធ្វើទៅមនុស្សវ័យក្មេង ពីព្រោះមនុស្សស្ថិតក្នុងវ័យ៤០-៥០ឆ្នាំនេះ ត្រូវបានសម្លាប់យ៉ាងច្រើននៅក្នុងរបបខ្មែរក្រហម។ ការរួមឆកនៃរចនាសម្ព័ន្ធនេះ រួមផ្សំជាមួយនឹងកំណើនប្រជាជនយ៉ាងគំហុកក្រោយរបបខ្មែរក្រហម បានតម្រូវឱ្យកម្ពុជាត្រូវវិនិយោគយ៉ាងច្រើនទៅលើសេវាសុខាភិបាល និងជំនាញសមរម្យមួយដែលនឹងជួយពួកគេឱ្យទទួលបាននូវការងារសមរម្យមួយក្នុងសង្គម។ ដើម្បីបង្កើតបាននូវការងារកាន់សមរម្យ កម្ពុជាបានតាំងចិត្តនិងធ្វើការទ្វេដងថែមទៀតក្នុងការបណ្ដុះបណ្ដាលជំនាញវិជ្ជាជីវៈ ធានាស្ថិរភាពម៉ាក្រូសេដ្ឋកិច្ច និងស្ថិរភាពនៃវិស័យទំនាក់ទំនងវិជ្ជាជីវៈសំដៅបង្កើនភាពទាក់ទាញវិនិយោគទុនពីបរទេសមកវិនិយោគលើវិស័យអតិពលកម្ម កម្មន្តសាល និងឈានជើងបណ្ដើរៗទៅកាន់វិស័យបង្គំបរិក្ខាប្រើប្រាស់ បរិក្ខាអគ្គីសនី។ល។ តាមកម្មវិធី ឯកឧត្តមរដ្ឋមន្ត្រីនឹងជួបប្រជុំទ្វេភាគីជាមួយតំណាងអង្គការ ILO ប្រចាំទីក្រុងញូយ៉ក ឯកអគ្គរដ្ឋទូតមួយចំនួនដែលជាមិត្តនៃកម្មវិធីការងារសមរម្យផងដែរ។
សន្និសិទស្តីពីផលលាភប្រជាសាស្ត្រនិងការងារសមរម្យនៅទីក្រុងញូយ៉ក
