ភាសាខ្មែរ 
English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
នាព្រឹកថ្ងៃទី២៧ ខែកុម្ភៈ ឆ្នាំ២០១៧ ឯកឧត្តម ម៉ម វណ្ណៈ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ ឯកឧត្តមបណ្ឌិតរដ្ឋមន្ត្រី អិុត សំហេង អញ្ជើញជាអធិបតីក្នុងពិធីបើកសន្និសីទទំនាក់ទំនងវិជ្ជាជីវៈ ស្ដីពីការធ្វើឱ្យប្រសើរឡើង ប្រព័ន្ធដោះស្រាយវិវាទការងារ-សុខដុមនីយកម្មក្នុងទំនាក់ទំនងវិជ្ជាជីវៈ នៅ សណ្ឋាគារ រ៉ាហ៊្វល ទ្បឺរ៉ូយ៉ាល់ ភ្នំពេញ។ សន្និសីទនេះ គឺជាវេទិកាមួយដ៏ល្អសម្រាប់អ្នកដែលធ្វើការពាក់ព័ន្ធនឹងវិស័យការងារ ដែលមានសមាសភាពមកពីតំណាងរាជរដ្ឋាភិបាល តំណាងធុរកិច្ច តំណាងសហជីព តំណាងនិយោជក ដៃគូអភិវឌ្ឍ អ្នកច្បាប់ ព្រមទាំងអ្នកឯកទេសផ្នែកទំនាក់ទំនងវិជ្ជាជីវៈអន្តរជាតិដើម្បីជជែកពិភាក្សា ស្វែងយល់ពីគ្នា និងផ្លាស់ប្តូរបទពិសោធន៍គ្នាទៅវិញទៅមក រួមគ្នាស្វែងរកដំណោះស្រាយក្នុងការធានាបាននូវសុខដុមរមនានៃទំនាក់ទំនងវិជ្ជាជីវៈនៅកម្ពុជា ក៏ដូចជាចូលរួមបន្តអភិវឌ្ឍសេដ្ឋកិច្ចប្រទេសជាតិយើងឱ្យកាន់តែរីកចម្រើនថែមទៀត ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។ ក្នុងភាពជាដៃគូក្នុងការធ្វើឱ្យ្រសើរឡើងនូវទំនាក់ទំនងវិជ្ជាជីវៈនៅកម្ពុជា ក្រុមប្រឹក្សាអាជ្ញាកណ្តាល និងក្រសួងការងារនិងបណ្តុះបណ្តាលវិជ្ជាជីវៈបានធ្វើការងារជាមួយគ្នាយ៉ាងជិតស្និតអស់រយៈពេលប្រមាណជាង ១៣ឆ្នាំ មកហើយ ដើម្បីឆ្ពោះទៅរកប្រព័ន្ធទំនាក់ទំនងវិជ្ជាជីវៈមួយល្អប្រសើរ សម្រាប់ទាំងនិយោជក និងកម្មករនិយោជិត។ កិច្ចសហការនេះ បានសម្រេចនូវសមិទ្ធផលជាច្រើនគួរឲ្យកត់សំគាល់ រួមទាំងការដោះស្រាយវិវាទការងារ ដោយគិតត្រឹមឆ្នាំ២០១៦ ក្រុមប្រឹក្សាអាជ្ញា កណ្តាលបានទទួលសំណុំរឿងវិវាទចំនួនជាង ២ ៦៥០ ដែលពាក់ព័ន្ធដោយផ្ទាល់ជាមួយកម្មករនិយោជិតជាង ១លាននាក់ ហើយទទួលបានអត្រាជោគជ័យចំនួន៧៥% ក្នុងចំណោមសំណុំរឿងវិវាទដែលបានដោះស្រាយទាំងអស់ តាមរយៈការផ្សះផ្សា និងមជ្ឈត្តកម្មដែលចំណាយពេលជាមធ្យម១៧ថ្ងៃ។ ក្រុមប្រឹក្សាអាជ្ញាកណ្តាលក៏បានចេញសេចក្តីបញ្ជាឱ្យបញ្ឈប់កូដកម្មជាបណ្តោះអាសន្ន ដើម្បីធ្វើការដោះស្រាយវិវាទតាមសន្តិវិធី ដោយមានអត្រាជោគជ័យចំនួន ៦៩% ដែលទាំងនេះគឺជាអត្រាជោគជ័យដ៏គួរឱ្យកត់សម្គាល់។ ជាមួយគ្នានេះដែរ ស្ថាប័នក្រុមប្រឹក្សាអាជ្ញាកណ្តាលក៏បានទទួលការកោតសរសើរពីសំណាក់ភាគីពាក់ព័ន្ធជាច្រើន ថាជាស្ថាប័នមួយដែលបានផ្តល់យុត្តិធម៌ប្រកបដោយវិជ្ជាជីវៈ និងបានចូលរួមចំណែកជួយដល់ការធ្វើឱ្យប្រសើរឡើងនូវផលិតភាពការងារ កំណើនសេដ្ឋកិច្ច និងការបង្កើនភាពប្រគួតប្រជែងដែលជាប្រយោជន៏ដល់ កម្មករនិយោជិតនិងនិយោជក។ លើសពីនេះទៅទៀត ក្រុមប្រឹក្សាអាជ្ញាកណ្តាលត្រូវបានទទួលស្គាល់យ៉ាងទូលំទូលាយក្នុងការដោះស្រាយវិវាទការងារ ព្រមទាំងទទួលបាននូវទំនុកចិត្ត និងការកោតសរសើរទាំងថ្នាក់ជាតិ និងអន្តរជាតិ។ មូលនិធិក្រុមប្រឹក្សាអាជ្ញាកណ្តាល និងក្រុមប្រឹក្សាអាជ្ញាកណ្តាលបាននឹងកំពុងរួមចំណែកយ៉ាងសកម្មក្នុងការពង្រឹងសុខដុមរមនាទំនាក់ទំនងវិជ្ជាជីវៈ បន្ថែម ពីលើការដោះស្រាយវិវាទការងាររួម ក៏មានការបើកវគ្គបណ្តុះបណ្តាលដល់ភាគីពាក់ព័ន្ធក្នុងការបង្ការ និងដោះស្រាយវិវាទការងារនៅកន្លែងធ្វើការផងដែរ។ សូមបញ្ជាក់ថា សន្និសីទបែបនេះត្រូវបានរៀបចំឡើងចំនួន ៧លើកកន្លងមកហើយ ដោយបានលើកយកប្រធានបទជាច្រើនមកធ្វើការពិភាក្សា នឹងបានផ្តល់នូវអនុសាសន៍ ដូចជាការធ្វើឱ្យប្រសើរឡើងនូវលក្ខខណ្ឌការងារ និងផលិតភាពការងារ ផលប៉ះពាល់ពីវិបត្តិសេដ្ឋកិច្ច ការចរចាអនុសញ្ញារួម និងភាពជាតំណាងរបស់សហជីព យន្តការនៃការកំណត់ប្រាក់ឈ្នួលអប្បបរមា កូដកម្ម ជាដើម។ ក្នុងសន្និសីទនាថ្ងៃនេះ ផ្តោតលើប្រធានបទសំខាន់៣ គឺ៖
១-គំរូប្រៀបធៀបពីអន្តរជាតិ-ដំណើរការ និងទំនាក់ទំនង រវាងស្ថាប័នតុលាការការងារ និងអាជ្ញាកណ្ដាល-គណៈកម្មការយុត្តិធម៌ការងារប្រទេសអូស្ត្រាលី និងតុលាការសហព័ន្ធ
២-ការពង្រឹង ការផ្ដល់អំណាច និងការពង្រីកសេវាក្រុមប្រឹក្សាអាជ្ញាកណ្ដាល និង ៣-ការស្វែងយល់អំពីអនាគត និងលទ្ធភាពកៀងគរធនធានសម្រាប់និរន្តភាពរបស់ក្រុមប្រឹក្សាអាជ្ញាកណ្ដាល។
